اسلام آباد۔16ستمبر (اے پی پی) وفاقی وزیر برائے قومی صحت سید مصطفیٰ کمال آکھیا جو اساں لوکاں کوں مریض بݨݨ توں بچاوݨے، مچھر لوکاں کوں ڈینگی وائرس اچ مبتلا کریندے پئن، شہراں اتے دیہاتاں اچ ڈینگی دے کیس ودھدے پئن۔ اے ڳالھ انہاں قومی انسداد ڈینگی مہم 2025 دے شروع تھیوݨ دی تقریب توں ڳالھ مہاڑ کریندیں ہوئیں آکھی۔ انہاں آکھیا جو میں اسلام آباد دے ݙو ایم این ایز توں اپیل کرینداں جو او ڈینگی توں بچاؤ دی مہم دا حِصہ ٻݨن۔ انہاں آکھیا جو انسانیت دی خدمت اساݙا مقصد ہووݨا چاہیدے، اللہ دی مخلوق کوں بیماری توں بچاوݨ دی کوشش ثواب دا کم اے۔ مصطفیٰ کمال آکھیا جو ہسپتالاں اچ مریضاں کوں ہر ممکن سہولتاں ݙیوݨ اساݙی ترجیح اے، اساں ہسپتالاں اچ مریضاں دا انتظار نی کرݨا۔ انہاں آکھیا جو اساݙی وزارت ٻئی وزارتاں توں وکھری اے اتے اساݙے تے ذمے واری وی ودھ اے اساں تے سوچ سمجھ تے توجہ نال کم کرݨا پوسی۔ انہاں آکھیا جو اساݙا مذہب اسلام ساکوں اللہ دی ہر مخلوق نال محبت دا درس ݙیندے، تساں اللہ دی مخلوق دی مدد کریسو تاں اللہ خوش تھیسی۔ انہاں ہیلتھ ورکرز نال ڳالھ کریندیں ہوئیں آکھیا جو اے وزارت اللہ دی مخلوق دی مدد کرݨ آلی اے، تساں سارے ورکرز اہم ہیوے کیوں جو تساں اللہ دی مخلوق کوں بچیندے پئیو۔ انہاں آکھیا جو اساݙے کول اتنے وسائل نئی اساں مشیناں اتے گاݙیاں ودھاوݨ دی کوشش کریندے پئیوں۔ تساں سارے ورکرز ڈینگی مہم کوں کامیاب بݨیسو۔ انہاں ݙسایا جو اساں کل سروائیکل کینسر توں بچاؤ دی ویکسینیشن مہم شروع کیتی اے، نظام صحت کوں جدید خطوط تے استوار کریندے پئیوں۔
