لاہور۔ 12 جولائی (اے پی پی):لاہور دے علاقے بھاٹی گیٹ اچ واقع گھراچ بھاہ لڳݨ توں ٻالاں سودھے 10 بندے سڑ تے جاں بحق تھی ڳئن ۔ترجمان ریسکیو 1122 موجب بھاٹی گیٹ دے علاقے محلہ سمیاں، نزد فیملی پارک ٹیکسالی، والڈ سٹی اچ واقع 2 مرلے دے گھردی ݙوجھی منزل تے اچانک بھاہ لڳ ڳئی جیں سارے گھر کوں آپݨی وکیڑ اچ گھن ڳھدا ، ترجمان موجب دم گھٹݨ توں 14 سالہ سونو،25 سالہ امبر،نوزائیدہ علمدار،14 سالہ مونو،60 سالہ تریمت سائرہ بانو ،16 سالہ عادل حسین،4 سالہ انزال فاطمہ،18 سالہ سنیہ ،15 سالہ سیماب اتے40 سالہ تریمت فرزانہ جاں بحق تھی ڳئن۔ ترجمان موجب واقعہ دی اطلاع ملدے ہی ریسکیو ٹیماں موقع تے پڄ تےبھاہ تے قابو پاتا تے لاشاں میو ہسپتال منتقل کرݙتیاں ۔ترجمان ݙسائے ریسکیو آپریشن اچ 33 ریسکیورز اتے 11 گاݙیاں حصہ ڳھدے ، گنجان آباد علاقہ ہووݨ دی وجہ توں اوکھ دے باوجود ٻہوں گھٹ ویلھے اچ آپریشن مکمل کیتا ڳئے۔
