راولپنڈی۔20جولائی (اے پی پی):وفاقی وزیر داخلہ شیخ رشید احمد آکھیے جو انڈیا،اسرائیل سودھے مخالف پاکستان لابی اسݙے ملک اچ ہائیبرڈ جنگ شروع کرݨ چاہندن جنہاں کوں منہ دی کھاوݨی پوسی ،افغان سفیر دی دھی خود تفتیش دا حصہ بݨدی تاں زیادہ چنڳاں ہوندا ،ریاست پاکستان ایں معاملے دی پوری چھان بین کریسی ،ملک دشمن پاکستان اتے چین دے درمیان غلط فہمیاں پیدا کرتے خطے اچ لاء اینڈ آرڈر صورتحال کوں خراب کرݨ چاہندن ،کشمیر اچ مریم نواز انتخابی مہم کشمیر کیتے یا نوازشریف دی جت کیتے کائنی بلکہ عمران خان دے خلاف کریندی پئی اے ،وزیر اعظم عمران خان دی قیادت اچ ملک اڳوں ودھدا پئے ،پاکستانی افواج اتے سول ادارے ہر قسم دے حالات کیتے تیار ہن ، پاکستان دی سرزمین افغانستان کیتے ہرگزاستعمال نہ تھیوݨ ݙیسوں ،نادرا اچ نقلی شناختی کارڈ اچ ملوث لوکاں دے خلاف مقدمات درج کرتے گرفتار کیتا ڳئے۔اے ڳال انہاں منگل کوں لال حویلی راولپنڈی اچ پریس کانفرنس توں خطاب کریندے ہوئیں آکھی اے ۔شیخ رشید احمد آکھیے جو پاکستان دے نینگراں کوں اے پیغام ݙیوݨ چاہندان جو الیکٹرنک میڈیا کوں سمجھتے ہوون او تیار کرن کیوں جو آندے ݙینھاں اچ ہائیبرڈوار اچ مزید تیزی آسڳدی اے ۔انہاں افغان سفیر دی دھی دے معاملے تے ڳال مہاڑ کریندے ہوئیں آکھیے جو ایں کیس تے افغان سفیر وآپس نہ ویندے تاں چنڳاں ہوندا اساں چاہندوں جو افغان سفیر دی دھی خود تفتیش دا حصہ بݨے اتے جے او اے مقدمہ نی وی لڑݨ چاہندی تاں ریاست پاکستان ایں معاملے دی پوری چھان بین کریسی ۔
