لاہور ۔ 28 نومبر (اے پی پی) وزیر ریلوے خواجہ سعد رفیق فاٹا کو ںریلوے نیٹ ورک اچ رلاونڑ اتے پشاور توں طورخم تئیں ریل لنک دی فزیبلٹی تیار کرنڑ دی ہدایت کر ڈتی ہے ، ریلوے اچ فیصلے گھنٹیاں اچ کیتے ونجن ناں جو مہنیاں اچ ۔ اے گالہیں انہاں ریلوے ہیڈکوارٹرآفس لہور اچ ML-1، ML-2 اتے ML-3 لنک بارے اجلاس دی صدارت اچ آکھیاں ۔ اجلاس اچ ابتدائی ڈیزائن اتے سروے بارے سی پیک ٹیم لیڈر محمد اشفاق خٹک وزیر ریلویز خواجہ سعد رفیق کوں بریفنگ دے دوران ڈسایا جو (کراچی ۔پشاور)ML-1 تے تیزی نال کم جاری ہے ، جیہڑا جو آندے مہینے تے اخیر تئیں مک ویسی ۔ وزیر ریلویز خواجہ سعد رفیق فاٹا بارے آپنڑیں رائے دا اظہارکریندے ہوئیں آکھیا جو فاٹا کوں قومی دھارے اچ گھن آونڑ دی لوڑ ہے جیندے کیتے ریلوے بنیادی کردار ادا کریسی ۔ سی پیک منصوبے دی کامیابی دے بعد تجارت دے ودھدے ہوئے حجم پاروں طورخم توں افغانستان تے سنٹرل ایشیاء تئیں رسائی حاصل کرنڑ کیتے چمن-سپن بولدک سیکشن دے متبادل روٹ بنڑاونڑ کیتے وی واضح حکمت عملی تیار کیتی ونجے ۔ وزیر ریلویز آکھیا جو موجودہ حکومت دیاں پالیسیاں اتے پاکستان ریلویز دے بہترین افراد دی مناسب حکمت عملی پاروں چائنیز اتے ایشین ڈویلپمنٹ بنک دے نال نال بئے ملک وی ہنڑ پاکستان ریلوے دے نال جوائنٹ وینچر کرنڑاں چاہندے ہن ۔ چیف الیکٹریکل انجینئرمسز امبرین زمان مسافر کوچز اچ 110وولٹ توں 220 وولٹ اچ تبدیلی بارے وزیرریلوے کوں بریفنگ ڈیندے ہوئیں ڈسایا جو 260 اچوں 51 کوچز اچ اے تبدیلی عمل اچ گھن آئی ونج سگدی ہے ۔ وزیر ریلوے آکھیا جو ایں تبدیلی نال نہ صرف مسافراں کوں کوچز اچ بہترین سہولتاں ڈیونڑ ممکن تھی سگسی جڈانجو ریل گاڈیاں دی کارکردگی اتے ریلوے دی آمدن اچ وی خاطر خواہ ودھارا تھی سگسی ۔ وزیر ریلوے کوں کوہاٹ -راولپنڈی ٹرین بحالی بارے ہنڑ تئیں دی تھیونڑ آلے اگوہیں تے چیف انجینئر اوپن لائن بشارت وحیدبریفنگ ڈتی ۔ اجلاس اچ چیئرپرسن ریلویز مسز پروین آغا، چیف ایگزیکٹو آفیسر محمد جاوید انور، مشیر ریلویز انجم پرویز، ممبر فنانس غلام مصطفی، سی پیک ٹیم لیڈر محمد اشفاق خٹک، ایڈیشنل جنرل منیجر ٹریفک مقصود النبی، ایڈیشنل جنرل منیجر انفراسٹرکچر ہمایوں رشید، ایڈیشنل جنرل منیجر مکینکل لیاقت علی چغتائی،ڈی آئی جی ریلوے پولیس شارق جمال، چیف آپریٹنگ سپرنٹنڈنٹ محمود حسن، چیف مکینکل انجینئرکیرج اینڈ ویگن عدنان شافع، چیف انجینئر سگنل محمد عطاء اللہ اتے چیف الیکٹریکل انجینئر مسزامبرین زمان سمیت بئے ریلوے افسراں شرکت کیتی۔
