اسلام آ??اد۔19 اگست (اے پی پی)وفاقی وزیر اطلاعات و نشریات عطاء اللہ تارڑ آکھیے جو حالیہ مون سون بارشاں اتے اربن فلڈنگ پاروں قیمتی انسانی جاناں اتے املاک کوں نقصان پڄیے، وزیر اعظم محمد شہباز شریف دی خصوصی ہدایت تے متاثرہ علاقیاں اچ ریسکیو اتے ریلیف سرگرمیاں کوں تیز کر ݙتا ڳئے، وفاقی حکومت، پاک فوج، این ڈی ایم اے اتے صوبائی حکومتاں دیاں مشترکہ کوششاں نال ہݨ تئیں 25 ہزار افراد کوں محفوظ جاہیں تے پچائے، 70 فیصد علاقیاں اچ بجلی بحال کیتی ڳئی اے۔ او منگل دے ݙینھ نیشنل ڈیزاسٹر مینجمنٹ اتھارٹی اچ ڈائریکٹر جنرل آئی ایس پی آر احمد شریف چوہدری اتے چیئرمین این ڈی ایم اے انعام حیدر ??لک دے نال مون سون بارشاں اتے سیلاب دی صورتحال دے حوالے نال میڈیا کوں بریفنگ ݙیندے پئے ہن۔ وفاقی وزیر اطلاعات آکھیا جو نیشنل ڈیزاسٹرز نال نبڑݨ کیتے این ڈی ایم اے اچ جدید ٹیکنالوجی آلا اسٹیٹ آف دی آرٹ سسٹم بݨایا ڳئے تاں جو موسم دی صورتحال سودھا وفاق، صوبیاں اتے ٻئے اداریاں وچال مربوط کوآرڈینیشن ہووے۔ انہاں آکھیا جو وزیراعظم دی ہدایت دے تحت حالیہ سیلابی صورتحال نال نبڑݨ کیتے وفاقی حکومت، پاک فوج، این ڈی ایم اے اتے صوبائی حکومتاں ہک مشترکہ حکمت عملی نال کم کریندے پین، لوکاں کیتے ریلیف اتے ریسکیو سرگرمیاں جاری ہین۔ عطاء اللہ تارڑ آکھیا جو خیبر پختونخوا دے ضلعیاں بونیر، شانگلہ، باجوڑ اتے سوات اچ بجلی دا نظام متاثر تھیا ہا، ٻھل گزریل 48 گھنٹیاں اچ 70 فیصد علاقیاں اچ بجلی بحال کر ݙتی ڳئی اے اتے باقی فیڈرز و گرڈز تے کم جاری اے۔ انہاں ݙسایا جو وفاقی وزیر اویس لغاری وزیر اعظم دی خصوصی ہدایت تے سوات اچ موجود ہن اتے بجلی دی مکمل بحالی تئیں اوتھاں ای موجود رہسن، سوات اچ م??اثرہ 35 فیڈرز اچوں 25 بحال تھی چُکین، بونیر اچ 9 اچوں 3 فیڈرز بحال تھئن جݙاں جو باقی تے کم جاری اے۔ انہاں آکھیا جو اے قومی ذمہ داری اے جیںدے تے وفاقی و صوبائی حکومتاں قومی جذبے دے تحت مِل تے کم کریندیاں پیئن۔ انہاں آکھیا جو ریلیف اتے ریسکیو کیتے ٻئے قافلے سوات اتے شانگلہ بھیڄیے ویندے پئن، امدادی سامان اچ جنریٹرز اتے ڈی واٹرنگ پمپس وی شامل ہن، تقریباً 1200 خیمے انہاں علاقیاں اچ بھجوائے ڳن، ترائے ہزار کلو گرام توں ودھ ادویات ݙتیاں ڳن، پنج سو توں ودھ میڈیکل ریلیف کیمپس قائم کیتے ڳئن، اسلام آ??اد پمز توں ہک خصوصی میڈیکل ٹیم وی ٻھڄوائی ڳئی اے، ہݨ تئیں 40 ٹن راشن پیکس وی متاثرہ علاقیاں کوں بھڄوائے ڳن۔ انہاں قوم توں اپیل کیتی جو او ایں اوکھے ویلھے اچ ہک مٹھ تھی تے اپݨی ذمہ داری ادا کرن۔ انہاں ڈی جی آئی ایس پی آر اتے چیئرمین این ڈی ایم اے دا شکریہ ادا کریندے آکھیا جو وفاقی حکومت، پاک فوج اتے این ڈی ایم اے دا صوبائی حکومتاں دے نال مسلسل رابطہ اے، ایں ویلھے اساں سارے ہک ہیں اتے نیشنل رسپانس دے تحت انہاں مشکلاں توں نکلݨ کیتے مِل تے کم کریندے پئے ہیں۔
