راولپنڈی۔21ستمبر( اے پی پی) ڈی جی آئی ایس پی آر لیفٹیننٹ جنرل احمد شریف چودھری کیڈٹ کالج پلندری دا دورہ کیتا جتھاں انہاں کالج دے طلباء و اساتذہ نال خصوصی نشست وچ شرکت کیتی۔ ایں موقع تے کالج دے ہال وچ منعقدہ تقریب وچ شرکاء افواج پاکستان کوں وطن عزیز دے دفاع، استحکام تے امن دے قیام کیتے ݙتیاں ڳئیاں قربانیاں تے زبردست خراج تحسین پیش کیتا۔ آئی ایس پی آر دے مطابق تقریب دے دوران ڈی جی آئی ایس پی آر نے شرکاء دے سوالات دے مدلل تے مفصل جوابات ݙتے، جیندے تے طلباء و اساتذہ انہاں دا شکریہ ادا کریندے آکھیا جو انہاں دی ڳالھ مہاڑ اساں کوں ٻہوں کجھ سکھݨ دا موقع ݙتے۔ پرنسپل کیڈٹ کالج پلندری آکھیا جو ڈی جی آئی ایس پی آر دی ڳالھ مہاڑ تے عزم طلباء دے حوصلے مزید بلند کر ݙتن۔ شرکاء زور ݙتا جو بطور ذمہ وار شہری، سوشل میڈیا تے گردش کرݨ آلیاں خبراں دی تحقیق تے تصدیق لازمی اے تاں جو دشمن دی پروپیگنڈہ مہم دا مؤثر جواب ݙتا ونڄ سڳے۔ انہاں ایں عزم دا اعادہ وی کیتا جے بھارت ول کہیں قسم دی جارحیت دی کوشش کیتی تاں اینکوں ہک واری ول ہزیمت تے رسوائی دا سامݨا کرݨا پوسی۔ تقریب وچ موجود کشمیری طلباء تے اساتذہ بھرپور جذبے نال آکھیا جو بطور کشمیری انہاں دا پختہ ایمان اے جو کشمیر پاکستان دی شہ رگ اے تے پاکستان و کشمیر کوں کوئی طاقت انڄ نی کرسڳدی۔ انہاں بابائے قوم قائداعظم محمد علی جناح دے ایں فرمان دا اعادہ کیتا جو “کشمیر پاکستان دا حصہ ہئی، ہے تے راہسی”۔ شرکاء آکھیا جو ڈی جی آئی ایس پی آر دی ڳالھ مہاڑ کنوں نہ صرف دفاع وطن وچ پاک فوج دے کردار تے قربانیاں کوں ڄاݨݨ دا موقع ملیا بلکہ قوم دے جذبہ حب الوطنی کوں وی نویں توانائی ملی۔ تقریب دے اختتام تے کیڈٹ کالج پلندری دے پہلے شہید، میجر رب نواز طارق دی عظیم قربانی کوں خراج عقیدت پیش کیتا ڳیا تے آکھیا ڳیا جو او سارے شہید اساݙی قوم دا فخر ہن۔ شرکاء ایں عزم دا اظہار کیتا جو او ہر قسم دی بھارتی جارحیت دے خلاف افواج پاکستان دے شانہ بشانہ کھڑن تے دفاع وطن کیتے کہیں وی قربانی کنوں پچھوں نہ ہٹسوں۔
