لاہور۔4 اکتوبر (اے پی پی) وزیراعظم محمد شہباز شریف آزاد جموں و کشمیر وچ مذاکرتی عمل دی کامیابی تے حکومتی مذاکراتی کمیٹی تے جوائنٹ ایکشن کمیٹی وچال معاہدے دا خیر مقدم کریندے آکھے جو امن دا قیام تے حالات دا معمول تے آ ونڄݨ خوش آئند اے، حکومت اپݨے کشمیری بھراویں دے مسئلیں کوں حل کرݨ کیتے ہر ویلھے تیار اے، افواہیں تے کن نہ دھرن، اساں پہلے وی کشمیری بھرا بھیݨ دے حقوق دے محافظ ہاسے تے اڳوں وی انہاں دے حقوق دا تحفظ کریندے رہسوں۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف مذاکراتی کمیٹی دے ارکان کوں خراج تحسین پیش کیتا تے انہاں دی انفرادی تے اجتماعی کوششاں دی تعریف کریندے شاباش ݙتی۔ وزیراعظم اینکوں پاکستان تے آزاد جموں و کشمیر دی وݙی کامیابی قرار ݙتا تے آکھیا جو امن دا قیام تے حالات دا معمول تے آونڄݨ چنڳی ڳالھ اے ۔ انہاں آکھیا جو سازشاں تے افواہیں آخر کار دم تروڑ ڳئن تے سارے معاملات خوش اسلوبی نال حل تھئے الحمدللہ۔ انہاں مذاکرات دی کامیابی تے جوائنٹ ایکشن کمیٹی دے ارکان دا وی شکریہ ادا کیتا تے امن دے قیام تے مبارخ ݙتی۔ وزیراعظم آکھیا جو حکومت اپݨے کشمیری بھراویں دے مسئلے حل کرݨ کیتے ہر ویلھے تیار اے ، عوامی مفاد تے امن اساݙی ترجیح اے تے آزاد کشمیر دی خدمت کریندے رہسوں، کشمیری بھراویں توں گزارش اے جو افواہیں تے کن دھرن توں گریز کرن۔ وزیراعظم آکھیا جو اساں پہلے وی کشمیری بھرا بھیݨ دے حقوق دے محافظ ہاسے تے اڳوں وی انہاں دے حقوق دا تحفظ کریندے رہسوں، آزاد کشمیر دے مسئلے تے ہمیشہ توجہ رہی اے تے میݙی حکومت ہمیشہ ترجیحی بنیاداں تے انہاں مسئلیں کوں حل کیتا۔
