اسلام آباد۔6ستمبر(اے پی پی) صدر مملکت آصف علی زرداری 12 ربیع الاول دے بابرکت اتے پرسعید ݙینھ تے پوری قوم اتے امت مسلمہ کوں مبارخ ݙیندے آکھیے جو اے تاریخی اتے یادگار موقع امت مسلمہ کیتے نہ صرف خوشی اتے عقیدت دا باعث اے بلکہ آپݨی انفرادی و اجتماعی زندگیاں کوں تعلیمات نبوی ﷺ موجب ڈھالݨ دا عہد وی اے۔ ایں 12 ربیع الاول دے نال نال ولادت نبوی ﷺ دے پندرہ سو سال مکمل تھیوݨ دی سعادت اساں کوں اے پیغام ݙیندی اے جو اساں نبی اکرم ﷺ ولوں عطا کیتے ڳئے آفاقی اصولاں، عدل، رحمت، اخوت اتے امن کوں آپݨے معاشرتی، سیاسی اتے تہذیبی ڈھانچے اچ لاگو کریسوں۔ اے ݙینھ پوری دنیا دے مسلماناں کوں ہک ایجھے رشتے اچ پروتے جیڑھا ایمان دی بنیاد تے استوار اے اتے جیں دا محور صرف اتے صرف رسول رحمت ﷺ دی ذات گرامی اے۔ ایوان صدر دے پریس ونگ توں 12 ربیع الاول دے موقع تے جاری آپݨے خصوصی پیغام اچ صدر مملکت آصف علی زرداری آکھیے جو ایں تناظر اچ قومی اسمبلی اتے سینیٹ متفقہ قرارداداں دے ذریعے ایں تاریخی موقع کوں قومی سطح تے یادگار طریقے نال مناوݨ دا فیصلہ کیتے جیڑھا پوری قوم دی نبی رحمت ﷺ توں والہانہ محبت اتے عقیدت دا مظہر اے۔ ایں توں انڄ اسلامی تعاون تنظیم (او آئی سی) وی سرکار کائنات ﷺ دی ولادت مبارکہ دے پندرہ سو سال مکمل تھیوݨ تے ایں سال کوں یادگاری سال قرار ݙتے پوری امت کوں ایں پیغام رحمت دے آسے پاسے ھک جاہ کر ݙتے۔ صدر مملکت آکھیے جو نبی کریم ﷺ دی سیرت طیبہ اساں کوں سکھیندی اے جو عدل و انصاف، رحم و کرم، اخوت و مساوات اتے انسانیت دا احترام ہک صالح معاشرے دی بنیاد ہن۔ اڄ جݙاں دنیا انتہاپسندی، ناانصافی، معاشرتی خلفشار اتے ڈیجیٹلائزیشن دے بے قابو رجحانات جیھے چیلنجز نال ݙوچار اے، اساں کوں سیرت مصطفی ﷺ دی روشنی اچ انہاں مسئلیں دا حل ڳولݨا اے۔ صدر مملکت آصف علی زرداری آکھیا جو امت مسلمہ اتے پاکستان اج جنہاں چیلنجز دا سامݨا کریندے پئن، انہاں دا حل نبی اکرم صلی اللہ علیہ وسلم دیاں تعلیمات اچ پنہاں اے۔ انہاں اساں کوں اتحاد، محبت اتے بھرپی دی تلقین کیتی اتے ایہے او اصول ہن جیڑھے اساں کوں معاشرتی اتے اقتصادی مسئلیں توں کݙھ سڳدن۔ صدر مملکت آکھیے جو آؤ اساں ایں موقع تے اے عہد کریسوں جو اساں آپݨے اختلافات کوں ھک پاسے کرتے آپݨے ملک اتے قوم دی ترقی کیتے متحد تھی تے کم کریسوں۔ صدر مملکت آکھیا جو نبی اکرم صلی اللہ علیہ وسلم ہمیشہ کمزوراں، یتیمان اتے ضرورت منداں دی مدد دا درس ݙتا، اساݙی ذمہ واری اے جو اساں نبی پاک صلی اللہ علیہ وسلم دے ایں عمل کوں اپنیسوں۔ انہاں آکھیا جو اساں ݙیکھ پئے ہاں جو وطن عزیز ایں ویلھے موسمیاتی تبدیلیاں دے شدید اثرات دا سامݨا کریندا پئے جیں دے نتیجے اچ ملک دے مختلف علاقیں اچ چھل دیاں تباہ کاریاں ݙیکھݨ اچ آندیاں پئن۔ صدر مملکت آکھیا جو ایں ہنگامی صورتحال اچ حکومت، مقامی انتظامیہ اتے امدادی اداریاں دیاں مشترکہ کوششاں جاری ہن تاں جو تکھے متاثرین دی حفاظت اتے بحالی ممکن تھی سڳے۔ ایہو موقع اے جݙاں اساں سرکار دوعالم دی سیرت طیبہ توں سبق ڳھندے ہوئیں آپݨے لوکاں دی کھلے دل نال مدد کرتے انہاں دی بحالی کوں تکھے ممکن بݨیسوں کیونجے نبی اکرم ﷺ وی ہر حال اچ ݙوجھیاں دی مدد اتے فلاح کیتے کوشش کریندے رہندے ہن۔ صدر آصف علی زرداری آکھیا جو آؤ! اساں ایں مبارک موقع تے عہد کروں جو اساں نبی اکرم صلی اللہ علیہ وسلم دیاں تعلیمات کوں آپݨی زندگی دا حصہ بݨیسوں اتے انہاں دی روشنی اچ آپݨے معاشرے کوں مساوات اتے امن دا گہوارہ بݨیسوں۔ میݙی دعا اے جو اللہ تعالیٰ اساں کوں نبی کریم صلی اللہ علیہ وسلم دی سیرت تے عمل کرݨ دی توفیق عطا فرماوے۔ آمین!
