اسلام آباد۔16جنوری(اے پی پی) وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے پی ٹی آئی کوں چیلنج اے جو ݙساوے نیشنل کرائم ایجنسی 190 ملین پائونڈز حکومت پاکستان کوں کیوں واپس کیتے؟ بانی چیئرمین پی ٹی آئی دا ذریعہ آمدن کیا اے؟ پی ٹی آئی دور اچ کابینہ اچ بند لفافہ کیوں منظور کیتا ڳئے؟ ہݨ سݨیے بانی چیئرمین پی ٹی آئی کرپشن سکینڈل توں بچݨ تے جیل توں ٻاہر آوݨ سانڳے ݙیل کرݨ چاہندن ، 190 ملین پائونڈ سکینڈل دی تاریخ اچ مثال نی ملدی ، اے پاکستانی عوام تے حکومت پاکستان دا پیسہ ہئی، فرد واحد دے فیصلے نال سرکاری سطح تے اتنی وݙی خورد برد کݙاہیں ݙیکھݨ اچ نی آئی ۔ پی ٹی وی ہیڈ کوارٹرز اچ پریس کانفرنس توں خطاب کریندے وفاقی وزیر اطلاعات آکھیے گزریل کئی ݙینھاں توں 190 ملین پائونڈ میگا کرپشن سکینڈل تے بحث جاری اے ، آزاد مبصرین تے تجزیہ کار وی ایں میگا کرپشن سکینڈل دے حوالے نال کہیں کوں بری الذمہ قرار نی ݙیندے پئے ۔ انہاں آکھیے اے تاریخ اچ میگا کرپشن سکینڈل اے، ھک فرد واحد دے فیصلے تے اتنی وݙی رقم دی خورد برد کیتی ڳئی ۔ وفاقی وزیر اطلاعات آکھیے ساݙی حکومت تے عالمی اداریں دا اعتماد اے، پاکستان دی معاشی درجہ بندی بہتر تھیندی پئی اے ، پی آئی اے سانڳے یورپ دی فلائٹس بحال تھی ڳئن ، ورلڈ اکنامک فورم دی رپورٹ اچ پاکستان دی معیشت دے حوالے نال مثبت اشاریے ݙتے ڳئن ، شرح سود گھٹ تھئی اے ، مہانگ دی شرح 38 فیصد توں گھٹ تے 3.9 فیصد تے آڳئی اے ، ملک دا ڈیفالٹ رسک ختم تھی چکے ، پچھلے ݙاہ یارھاں مہینے اچ ملک اچ چنڳیاں خبراں آئن ، ٻاہرلی سرمایہ کاری آندی پئی اے لیکن ھک او حکومت وی ہئی جیں دے ہتھ 190 ملین پائونڈ میگا کرپشن اچ رنڳیے ہوئن ، جیڑھی ہر ویلھے ایں کھوج اچ رہندی ہئی جو پیسے کیویں کماوݨے ہن ،۔انہاں آکھیے 190 ملین پائونڈ میگا کرپشن سکینڈل دی تاریخ اچ مثال نی ملدی ، بانی چیئرمین پی ٹی آئی اتے شہزاد اکبر اوں ویلھے وی لڳیے رہیے جو کہیں طریقے نال شہباز شریف دے خلاف ٻاہرتوں کوئی ورڈک گھن گھنن ، این سی اے شہباز شریف دے خلاف پنج ملکاں اچ تحقیقات کیتیاں، انھاں دے خلاف ھک ݙھیلے دی کرپشن نی ملی ، برطانوی نیشنل کرائم ایجنسی شہباز شریف کوں بے گناہ قرارݙتا، ایں نیشنل کرائم ایجنسی 190 ملین پائونڈ ضبط کرتے پاکستان بھجوائے، میݙا سوال اے جو این سی اے اے پیسہ حکومت پاکستان کوں کیوں ݙتا ؟ جے اے رقم حکومت پاکستان دی ملکیت کائناں ہئی تاں ول این سی اے ھک پرائیویٹ شخص دی ملکیت اچ کیوں نی رہݨ ݙتا تے کیا لوڑھ پیش آئی جو او پیسہ چاتے حکومت پاکستان کوں ݙتا ۔ انہاں آکھیے اے پیسہ ایں سانڳے حکومت پاکستان کوں ݙتا ڳیا جو کیوں جو او پیسہ پاکستان تے پاکستان دے عوام دی امانت ہئی، اے ٹیکس پیئرز دا پیسہ ہئی ، اے صحت، تعلیم، انفراسٹرکچر، پاکستان دی ترقی تے خرچ تھیوݨا ہئی ۔ انہاں آکھیے پی ٹی آئی کوں چیلنج اے او واضح کرے جے حکومت پاکستان، سرکاری خزانے اتے عوام دا پیسہ کائناں ہئی تاں برطانیہ حکومت پاکستان دے حوالے کیوں کیتا؟ جیویں اے پیسہ آئے اتھوں ملی بھگت اتے کرپشن دی کہانی شروع تھئی۔ بانی چیئرمین پی ٹی آئی، انھاں دی ذال تے فرح گوگی بزنس ٹائیکون توں پنج قیراط دیاں مندریاں منڳیاں ، لاہور زمان پارک اچ کروڑاں روپے دا نواں گھر بݨیا، ایں دے پیسے کتھوں آئے ؟ انہاں آکھیے بانی چیئرمین پی ٹی آئی پاکستان دی تاریخ دا واحد لیڈر اے جیڑھا آکھدے جو انہاں دا ذریعہ آمدن کائنی۔ پی ٹی آئی کوں ݙوجھا چیلنج اے جو او بانی چیئرمین پی ٹی آئی دا ذریعہ آمدن ݙسا ݙیوے ، او کتھوں کمیندن تے کھاندن ، لاہور اچ 25 کروڑ دا گھر کیویں بݨیا ؟ اے رقم ایں پراپرٹی ٹائیکون توں 190 ملین پائونڈ دے عوض آئی۔ انہاں آکھیے انہاں مذہب کوں اپݨے مقصد سانڳے استعمال کیتا، میاں بیوی رل تے القادر ٹرسٹ دے ٹرسٹی بݨیے، جے انہاں ٹرسٹ ہی بݨاوݨا ہئی تاں ایدھی تے چھیپا آلیں نال رل تے بݨیندے، اے کیجھا ٹرسٹ اے جیں دا پیسہ بزنس ٹائیکون دا اتے ٹرسٹی میاں بیوی بݨیے رہیے ۔جݙاں این سی اے دی طرفوں پیسہ حکومت پاکستان کنے آیا تاں انہاں پراپرٹی ٹائیکون توں پچھیا جو او کیا چاہندن ، انہاں ایندے ذمہ سپریم کورٹ اچ ارباں روپے دا جرمانہ ادا کرݙتا تے ایہو پیسہ چاتے اتھاں ݙے ݙتا سپریم کورٹ دا آرڈر آیا جو انہاں ھک بندے توں ڈکیتی کیتی اے تے ݙوجھے بندے کوں پیسے ݙتے ، عوام کوں کجھ نی ملیا ۔ وفاقی وزیر اطلاعات آکھیے اڄ تئیں کابینہ اچ بند لفافہ نی ݙٹھا ، کابینہ اچ جیڑھا ایجنڈا آندے ایں تے بحث تھیندی اے ، ایں ویلھے دی کابینہ اچ شہزاد اکبر بند لفافہ بانی چیئرمین پی ٹی آئی کوں ݙتا تے آکھیے اینکوں منظور کر ݙیون، ݙو ترائے ارکان پچھیے جو انہاں کوں آکھیا ڳئے جو تساڈا ایں نال کوئی تعلق کائنی ، تساں ایں کوں منظور کرو ، ھک فرد واحد دے فیصلے توں ھک بندے کوں 80 توں 90 ارب روپے دا فیدہ ݙتا ڳیا ایں فیدے دے عوض بانی چیئرمین پی ٹی آئی، انھاں دی ذال تے فرح گوگی ارباں روپے کمائے، فرح گوگی پاکستانی شہری ہئی، ایں دے ریڈ وارنٹ ہن، اینکوں پاکستان گھن آوݨ دی کوشش کیتی ویندی پئی اے ۔ وفاقی وزیر اطلاعات پی ٹی آئی دی لیگل ٹیم کوں چیلنج ݙتے جو تساں اسمبلی اچ اتے ٻاہر وݙیاں وݙیاں ڳالھ کریندے پیو ، تساں ݙساؤنیشنل کرائم ایجنسی اے پیسہ حکومت کوں کیوں واپس ݙتے؟ حکومت پاکستان دا پیسہ چاتے تساں ایں پراپرٹی ٹائیکون دا ھک جرمانہ ادا کرݙتا، پاکستان دی تاریخ اچ ڈکیتی دی اتنی وݙی تاریخ نی ملدی ۔ انہاں آکھیے میکوں 190 ملین کرپشن کیس اچ ݙسا ݙیو جو کابینہ توں بند لفافہ منظور کروا تے پاکستانی قوم کوں اتنا وݙا ٹیکہ لاوݨ دا تساں کنے کیا جواز ہئی؟ انہاں اپݨے دور اچ اساں تے کوڑے کیس بݨائے جنہاں اچ اساں باعزت بری تھئے۔ انہاں آکھیے القادر یونیورسٹی اچ کیڑھے ٻال پڑھدے پئن ؟ کیمریں اچ ݙکھاوݨ سانڳے اتھاں کرائے تے لوک ٻلہائے ہوئن ، القادر یونیورسٹی کوں ٻݨیے کئی سال تھی ڳئن کتنی ڈگریاں جاری تھئن ۔ وزیر اطلاعات و نشریات آکھیے پاکستان دی تاریخ دے ایں ساریں توں وݙے میگا کرپشن سکینڈل اچ بانی چیئرمین پی ٹی آئی، بشریٰ بی بی اتے فرح گوگی دے ہتھ کرپشن اچ رنگیے ہوئن پی ٹی آئی ثابت کرے جو حکومت پاکستان دا پیسہ کائناں ہئی تساں ثابت کرو بند لفافہ کابینہ اچ نی گھن آیا ڳیا ، ثابت کرݙیو جو 25 کروڑ روپے نال لاہور دا گھر نی بݨیا ، پنج قیراط دیاں مندریاں نی گھندے رہیے۔ انہاں آکھیے آزاد مبصرین منیندے پئن جو القادر کرپشن میگا سکینڈل اے، ایں قوم دا 80 توں 90 ارب روپیہ ہتھیایا ڳئے، اساں انصاف دی توقع رکھیندوں ، جیڑھا کیتے او بھوڳݨا پوسی ، انصاف دے تقاضے پورے تھیسن ، اے وݙیاں وݙیاں تقریراں کریندن ، بانی چیئرمین دا کوئی ذریعہ آمدن کائناں ہئی تساکوں چاہیدا ہئی این سی اے توں آیا پیسہ قومی خزانے اچ جمع کرویندے فلاحی منصوبیں تے لیندے مگر افسوس اے اربوں روپیہ قوم دا ہتھیایا ڳئے، قوم ایں دا حساب منڳدی اے اے پیسہ کتھاں لڳیے ۔ ھک سوال دے جواب اچ وزیر اطلاعات آکھیے میگا کرپشن سکینڈل تے کوئی مذاکرات نی تھی سڳدے اساں چاہندوں مثبت طریقے نال اڳوں ودھے مگر کرپشن تے ڈیل نہ تھیسی ، بانی چیئرمین ڈیل کرݨ چاہندن کیوں جو انہاں کرپشن کیتی اے ہݨ انہاں دا ایں توں بچ تے نکلݨ اوکھا ہوسی ، آپݨے لوکاں کوں آکھدن میکوں جیل اچ کڈھو ۔ علی امین گنڈاپور دی ملاقات انھاں دا آپݨا معاملہ اے ۔ ھک ٻئے سوال تے وزیر اطلاعات آکھیے فرح گوگی پہلے پاکستان توں چلی ڳئی ہئی ، شہزاد اکبر کوں دعوت ݙینداں پاکستان آون، اساں آکھدے ہاسے اقتدار ویلھے دا دھارا ہوندے ، پورے پاکستان دے سیاستداناں تے کیسز بݨاوݨ آلا شخص اڄ لندن ٻیٹھے، پاکستان آوے تے کیساں دا سامݨا کرے ، اے ٻاہر ٻہہ تے ڳالھیں کریندن جے ڳالھیں ہی کرݨیاں ہن تاں ٻہہ تے کریندے ، انہاں فنکاراں پاکستان دی سیاست کوں زہر آلود کیتے تے پاکستان توں بھڄ ڳئن اڄ کل پاکستان دے اداریں دے خلاف ڳالھیں کریندن ، ٻاہر ٻہہ تے ڳالھیں کرݨ سوکھا اے ، کل لندن اچ انہاں کوں وݙی بڑی شرمندگی دا سامݨا کرݨا پئے انہاں کوں پارلیمنٹ دے اندر میٹنگ کرݨ سانڳے کمرہ تئیں نی ملیا ، انہاں دا اتھوں پاکستان دے اداریں، وزیراعظم، آرمی چیف دے خلاف پوری کمپین چلاوݨ دا ارادہ ہئی ،ٻاہر دے لوکاں کوں وی سمجھ آندی پئی اے اے فلاپ لوک ہن تے انہاں دی سیاست پاکستان کوں تقسیم کرݨ سانڳے ہے ۔ ھک سوال دے جواب اچ وزیر اطلاعات آکھیے 190 ملین پائونڈ دا کیس ٹرائل کورٹ اچ چلدا پئے ، ناقابل تردید ثبوت پیش کرݙتے ڳئن ۔ وزیر اطلاعات و نشریات آکھیے مذاکرات دا تاثر نہ ڳھدا ونڄے جو ارباں دی کرپشن تے پردہ پاتا ویسی ۔ پاکستان ساریں توں پہلے ہے ، پاکستان دے عوام دے پیسے تے کوئی سمجھوتہ نہ تھیسی کرپشن کیس دا جواب ݙیوݨا ہوسی جو کیا اے ، ایں دا حساب ہر حال اچ تھیسی ، اساکوں آکھدے ہن رسیداں کڈھو، ہݨ انہاں دی 80 ارب روپے دی رسید نکل آئی اے، ایں دا مذاکرات نال کوئی تعلق کائنی۔ ھک ٻئے سوال تے وزیر اطلاعات آکھیے سپہ سالار دا معیشت دی بحالی دے حوالے نال کردار قابل ستائش اے، ٹیم ورک دے تحت پاکستان دی معیشت بحال تھئی اے۔
