اسلام آباد۔16ستمبر (اے پی پی) نائب وزیراعظم اتے وزیر خارجہ سینیٹر محمد اسحاق ڈار کھاد بݨاوݨ آلے اداریں کوں گیس دی پائیدار فراہمی بارے اجلاس دی صدارت کیتی جئیں دا مقصد کساناں کیتے یوریا دی مستحکم قیمتاں اتے ویلھے تے دستیابی کوں یقینی بݨاوݨ اے۔ نائب وزیراعظم دے آفس توں منگل کوں جاری بیان دے مطابق کمیٹی قیمتاں دے تعین دے طریقے تے ڳالھ کیتی، کھاد دے پلانٹس کیتے گیس دی موجودہ مختص رقم اتے کساناں دی استطاعت دے نال صنعت دی پائیداری کوں متوازن کرݨ کیتے آپشنز دا جائزہ ڳھدا۔ نائب وزیر اعظم وزارتاں، ریگولیٹرز اتے صنعت وچال ہک متفقہ سوچ دی لوڑھ تے زور ݙتا تاںجو گیس دی فراہمی دی ضمانت ݙتی ونج سڳے اتے مارکیٹ اچ وگاڑ کوں روکیا ونج سڳے۔ انہاں متعلقہ فریقاں کوں ہدایت کیتی جو او ایہو جیہی حکمت عملی بݨاون جو کساناں کوں قیمتاں اچ اتار چڑھاؤ اتے قلت توں محفوظ رکھے۔ اجلاس اچ وزراء برائے نیشنل فوڈ سکیورٹی، بجلی، موسمیاتی تبدیلی اتے نجکاری، وزیراعظم دے معاون خصوصی ایم طارق باجوہ دے علاوہ چیئرمین فیڈرل بورڈ آف ریونیو، چیئرمین مسابقتی کمیشن آف پاکستان، نیشنل کوآرڈینیٹر پاور، متعلقہ سینئر سرکاری حکام اتے فرٹیلائزر انڈسٹری دے نمائندیاں شرکت کیتی۔
