پشاور۔ 20 اگست(اے پی پی)وزیراعظم محمد شہباز شریف آکھیے جو صوبیاں نال رَل تے طوفان اتے چیلنج دا مقابلہ کریندے پئے ہیں، ، حالیہ قدرتی آفت اچ 700 توں ودھ لوک اللہ کوں پیارے تھی ڳئے، اڳو تے اینڄھے واقعیاں کوں روکݨ کیتے خطرناک جاہیں تے تعمیرات کوں روکݨا ہوسی۔ اے ڳالھ انہاں بونیر اچ سیلاب متاثرین نال خطاب کریندے آکھی۔ ایں توں پہلے وزیراعظم متاثرین اچ امدادی چیک ونڈیے۔ ایں موقع تے وفاقی وزراء، چیئرمین این ڈی ایم اے، کور کمانڈر پشاور اتے ݙوجھے حکام وی موجود ہن۔ وزیراعظم محمد شہباز شریف آکھیا جو “میں اتھاں وݙے جانی اتے مالی ضیان تے افسوس کرݨ آیاں، اللہ مرحومین کوں جنت اچ ڄاہ ݙیوے اتے صبر آوے۔ وزیراعظم آکھیا جو اچانک بدل پھٹݨ اتے پاݨی پہاڑاں توں پتھراں اتے درختاں دے آوݨ پاروں کہیں کوں بچݨ دا موقع نئیں ملیا اتے وݙی تباہی تھئی اے، صوابی، شانگلہ، بونیر، سوات، لوئر دیر، باجوڑ، جنوبی وزیرستان اتے مانسہرہ اچ گزریل کجھ ݙینھاں اچ ڄو کڄھ تھئے ایندے تے ہر ہک کوں افسوس اے، تقریباً 350 توں ودھ ساݙے ٻھیݨ اتے ٻھرا خیبر پختونخوا اچ شہید تھئے، سینکڑاں زخمی تھئن اتے حالی وی کڄھ لاپتہ ہن۔ پنجاب، سندھ، بلوچستان، آزاد کشمیر اتے گلگت بلتستان اچ ساݙے 700 توں لوک اللہ کوں پیارے تھئین، 2022 اچ وی ایہو ڄھیں شدید آسمانی آفت آئی ہئی جیںدے اچ صوبہ سندھ اچ لکھاں ایکڑ زمیناں اتے فصلاں تباہ تھیاں ہن، لکھاں گھر تباہ تھئن۔ انہاں آکھیا جو ہݨ ول وفاق صوبیاں دے نال رَل تے اتھاں خیبر پختونخوا اچ ایں طوفان اتے چیلنج دا مقابلہ کریندے پئے ہیں، ایں سانقے کہین نال وانڄھ نا ورتیا ویسی، ساݙی ذمہ واری اے جو ہک ٻعے دا ہتھ ونݙاووں، جیڑھے وی ساݙے وسیلے ہن او عوام دی خدمت اچ قربان کرݨن۔ وزیراعظم آکھیا جو بجلی دے وزیر اتے سیکرٹری ایں ویلھے خیبر پختونخوا اچ موجود ہن، بونیر اتے سوات اچ جیرھے 47 فیڈرز ہین، ایںدے اچوں 37 ول کم شروع کر ݙتے، کَل میں واضح ہدایت کیتی ہئی جو بغیر کہیں وانڄھ دے ہک ہفتے کیتے لوڈشیڈنگ نا کیتی ونڄے، ہر جاہ تے بجلی پُچیسوں، تباہ تھیاں سڑکاں اتے پُل ٹھیک کرݨ کیتے ساݙے وزیر کمیونیکیشن اتے سیکرٹری کمیونیکیشن ایں ویلھے گلگت بلتستان اچ ہن۔ وزیراعظم آکھیا جو “ساݙی تفصیلی میٹنگ تھئی جیںدے اچ سپہ سالار فیلڈ مارشل سید عاصم منیر، کور کمانڈر پشاور، چیئرمین این ڈی ایم اے، متعلقہ وفاقی وزراء، انجینئر امیر مقام، وزیر منصوبہ بندی احسن اقبال، موسمیاتی تبدیلی دے وزیر مصدق ملک، وفاقی وزیر اطلاعات عطاء اللہ تارڑ موجود ہن، باقی وزراء فیلڈ اچ کم کریندے پئن۔ وزیراعظم آکھیا جو 2022 دے ݙکھ ݙیوݨ آلے واقعات اپݨے اکھیں نال ݙٹھے جو دریا دے پاسے ٻھل بالکل اندرو ہوٹل بݨیے ہوئے ہن، دنیا اچ کتھاہیں کوئی قانون نئیں جو تساں کمائی کیتے اینڄھی خطرناک ڄاہ تے ہوٹل بݨاؤ۔ حالی وی ٻئے ݙو اسپیل آوݨن، ایندے کیتے اقدامات کرݨے ہوسن، انسانی غلطی دی کوئی معافی نئیں، اتھاں دے لوکاں کیتے اے قیامت صغریٰ اے۔ انہاں آکھیا جو “ساݙے وزراء، صوبائی حکومت ݙینھ رات کم کریندیاں پئن، علی امین گنڈا پور، چیف سیکرٹری، آئی جی ساریاں دا شکر گزار ہیں۔” “فیلڈ مارشل عاصم منیر دی قیادت اچ افواج پاکستان ݙینھ رات کم کریندیاں پئین، ہک پاسے ساݙا خوارج دے خلاف مقابلہ اے، دہشت گردی دے خلاف مقابلہ اے، اوتھاں ساݙے جوان و افسر شہید تھیندے پئن اتے ݙوجھے پاسے ایں آفت دا مقابلہ اے، سید عاصم منیر افواج کوں حکم ݙتے جو او جتھاں جتھاں پُڄ سڳدن، پڄن اتے ݙکھی ٻھیݨ ٻھراواں دی مدد کرن۔ ایف سی، صوبائی حکومت اتے وفاقی حکومت پوری کوشش کریندی پئی اے، الخدمت فاؤنڈیشن اتے ݙوجھے ادارے اڳوں ودھ تے ایں چنڳے کم اچ حصہ گھندے پئن، اللہ تعالیٰ انہاں کوں ول ہمت ݙیوے، اے ساݙی سانجھی ذمہ واری اے جیندے اچ نا کوئی سیاست اے نا ریاکاری۔ میں علی امین گنڈا پور دی حکومت، سپہ سالار عاصم منیر، افواجِ پاکستان دے افسراں، ساریاں کوں سلام کرینداں، ہک ݙو ݙینھ اچ میٹنگ اچ چارے صوبائی وزرائے اعلیٰ اتے چیف سیکرٹریز کوں دعوت ݙیساں اتے ہک فیصلہ کرݨے جو اڳو تے دریا دے نال تعمیرات کوں روکݨے، ایکوں ہک تحریک بݨاوݨے، سارے ایں مہم دا حصہ بݨن۔
