اسلام آباد۔8اکتوبر(اے پی پی) چیئرمین سینیٹ سید یوسف رضا گیلانی 8 اکتوبر 2005ء دے زلزلے دے حوالے نال اوں کوں یوم استقامت دے طور تے یاد کریندے آکھیے جو اے ݙینھ اساکوں قربانی، اتحاد اتے ایثار دے جذبے کوں تازہ کرݨ دا موقع ݙیندے۔ سینیٹ سیکرٹریٹ توں جاری بیان موجب چیئرمین سینیٹ آکھیا جو 2005ء دا زلزلہ پاکستان دی تاریخ دا ہک افسوس ناک باب اے، جݙاں لمحے اچ ہزاراں وستیاں مُک ڳئیاں اتے ہزاراں قیمتی جاناں ضائع تھی ڳئیاں پر ایں المیے قوم کوں ہک لڑی اچ پروݙتا اتے ہر پاکستانی متاثرین دی مدد کیتے مثالی یکجہتی دا مظاہرہ کیتا۔انہاں آکھیا جو اڄ وی زلزلے دیاں تباہ کاریاں اساݙی اجتماعی یادداشت دا حصہ ہن اتے اساکوں انہاں سانحے توں سبق سِکھ تے آپݨے اداریں اتے نظام کوں مزید تکڑا بݨاوݨا ہوسی۔ چیئرمین سینیٹ زور ݙتا جو قدرتی آفتاں نال نبڑݨ کیتے قومی سطح تے مربوط حکمت عملی، مضبوط ادارہ جاتی تعاون اتے عوامی آگاہی ویلھے دی لوڑھ اے۔ انہاں آکھیا جو اڄوکی چھل اتے ماحولیاتی تبدیلیاں اساکوں ہک واری ول یاد کروائے جو اساکوں 2005ء آلے قومی جذبے کوں زندہ کریندے ہوئیں مصیبت زدہ بھراویں اتے بھیݨاں دے نال کھڑا تھیوݨا چاہیدے۔ چیئرمین سینیٹ آکھیا جو جنگلات دا تحفظ، وݨ رہاوݨ اتے ماحولیاتی بہتری دے اقدامات قدرتی آفتاں توں بچݨ کیتے ٻہوں ضروری ہن۔ انہاں عوام توں اپیل کیتی جو او چھل متاثرین دی مدد، شجرکاری مہم اتے ماحولیاتی استحکام دے قومی پروگراماں اچ ودھ چڑھ تے حصہ گھنن تاں جو اساں اڳوں آوݨ آلیاں نسلاں کیتے ہک محفوظ، ساوا اتے مستحکم پاکستان بݨاسڳوں۔
